Alleigänger

Über Einzelgänger i de Bärge, wo verantwortigs- u chopflos i Ys, Schnee u Felse umestreune, isch scho viel gschribe worde. U doch chunnt’s täglech vor, dass i us der Luft Dutzendi vo settige Eigebrödler cha beobachte. Gärn wird me als Wältverbesserer häregstellt oder sogar no rächt arrogant abtah, we me dene Bursche e chly der Duume druf het. I würds nid säge, wenn ig’s nid scho es paarmal erläbt hät. Aber, we me scho guet gnue isch, d’Folge vo settigem Eigesinn ga zämezläse, de darf me my Tüüri o drüber futtere.........

Mir Pilote vo der Rettigsflugwacht dörfe ja numen a ganz bestimmte Stelle im Training lande, müesse aber die Verletzte i de unmüglechschte Lage reiche, wo mir nie vorhär hei dörfe probiere. Geit’s einisch lätz, de schlöh mir i dr Regel üsi Chischte zäme, u der Schade geit de o grad no zu Laschte vom Läbesretter, wo ersch no Gfahr louft, der Chopf by dene Ärnschtfäll yzchlemme. Warum’s überhoupt no Pilote git, wo no usrücke, cha me sich nid rächt erkläre........

I bi zum Flugzüg grennt u ha der Cessna-Hans pär Flugfunk bätte, är möchti so guet sy u über Bärn en Ambulanz uf e Militärflugplatz Interlake bschtelle. U de söll är z’Bärn e Landebewilligung für e Militärflugplatz yhole. Nid emal am Sunntig dörfe mir Rettigsflug-Pilote nämlich ohne usdrücklichi Bewilligung z’lnterlake lande! Früecher sy mir im Neuhuus usse z’Bode, aber jetz isch dert e Golfplatz u dermit fertig mit abhocke. Es isch scho mängisch vorcho, dass i über ne halb Stund ha müesse i dr Luft oder uf em Männliche warte, bis die Bewilligung ytroffe isch. Ornig muess sy, und am Pilot, wo 15 Jahr isch Fourier gsy uf däm Flugplatz, wär am Änd nid ganz z’troue...