D’Konkordia Hütte

Vor bald hundert Jahre (1876) isch die erschti Konke-Hütte boue worde. Dennzumal isch dr Aletschgletscher no so höch gsy, dass me schier äbeswägs isch zur Hütte zueche cho. Zwöi- oder drümal isch sie syder vergrösseret worde u dr Abstand vom Gletscher zur Unterkunft ufe isch jedesmal gwachse gsy. Hüt brucht me e Holzleitere mit über 200 Seigel für ufe z’cho. Dr Bysi-Chrigel, wie me der Christian Kaufmann z’Grindelwald aredt, isch dert obe fasch 2900 Meter mit syr Frou u feuf Chind syt sächs Jahr e guete Hüttewart. Dr letscht Umbou vo 1967 het ihn e chly häregno. Syne 62 Jahr isch die Schinderei doch chly zviel worde, aber ds fröhliche Lache u dr guet Luun het er nie verlore.........

Nötli tröchne ir Konkehütte

Alli Hüttewarte sy dernäbe no Bärgfüehrer. Wes am ene Ort schief geit, müesse sie usrücke. Färn isch en Usländer mit Frou u Chind dr Aletschgletscher uf cho. Churz under dr Hütte het er wölle vorfüehre, wie me überne Brügg geit. Sie het nahglah u der Vater isch öppe vier Meter abe gheit u bis zur Bruscht im Wasser-Schrund gstande. Ds Mammi het ne möge bha u ds Gieltschi isch abghaset, für em Chrigel z’rüefe. Zämethaft hei sie die Wasserpflanze borge. Wüll dr Rucksack o under Wasser gsy isch, het ne die trocheni Wösch gfählt. Der Ma het sich ganz abzoge u isch i Strumpfhose us em Sack vo dr Frou i d’Hütte ufe. Dr Frou sy d’Finger ganz blau u fasch abgstorbe gsy vom Seili. I der Konke isch die grossi Sorg ds nasse Papiergäld gsy. A dr Sunne hei sie d’Nötli tröchnet un es jedes mit eme Schtei beschwärt. Dr Chrigel het dere Usstelig zuegluegt u für sich dänkt, dä Ma syg ömel de afe nid der ermscht. Du fragt dä Herr uf z’mal: «Was bin ich Ihnen schuldig?» Druf der Chrigu: «Oh, wohl epe nid, das ghehrt zu üser Pflicht.» Der ander wieder: «Was Sie mir getan haben, kann man mit Geld nicht gutmachen» – und är het em Chrigel ke rote Rappe gäh. Syder isch es Jahr vergange, u dr Chrigel het nie keis Merci, geschwiege no es tröchnets Nötli übercho. Was sy das o für Lüt? «E nöü Sorte Löle» würd my Fründ Hans säge.