D’Mutthornhütte
Mys grosse Vorbild, my Fluglehrer Hermann Geiger, isch uf em Kanderfirn zerschtmal i dr schwyzerische Gletscherflügerei zum Zug cho u het ungfähr 20 Tonne Material vom Wallis ufegfloge. Das het gäge 150 Flüg gäh, u vo däm Moment ewäg het ds Gletscherflugzüg als nützleche Lastesel u Hälfer sy Platz trotz de Helikopter behouptet. 15 Jahr lang isch es em Hermann vergönnt gsy, tuusegi vo Flüg i üsne Bärge z’mache, Mönsche z’hälfe u sie z’rette. Är het derby o nid nume Dank g’ärntet, weiss Gott nid, u isch e chly en eigete worde. I gange öppe mit mir i ds Gricht u frage mi, ob ig scho so syg. I de Bärge geit’s mängisch strub zue, mi ma chum erzittere, was me angschtet u wird derby schuderhaft chly. Me lehrt sich de Naturgwalte unterordne u gspürt, dass me niemer isch. Dene Naturgwalte z’trotze u usezfinge, wie wyt das me darf gah, isch e gsundi mönschlichi Eigeschaft. Wo isch aber d’Gränze? Das fragen i mi fasch all Tag. De chunnt me plötzlich abe, u de möögget eim eine underem Tisch vüre ah oder behandlet eim wie Schnuder, eine wo nid emal weiss, was me macht oder wo chlepft mit dr Geisle, wüll er us sym Versteck use u i syr Armuet meint, me müess die Ross trybe, wo zieh am Chare. Potz Liebermänt, i wett dä gseh, wo da nid «eigelige» würd.........
Du simer halt i alter Manier i «Bäre» ga löie, bis es üs i ds Chrütz gschlage het. Dert het der Grossvater mängs Müschterli gwüsst z’verzelle. Ds ydrücklichschte isch aber doch das gsy, won er brichtet het, wie lang es früecher gange isch, bis me e Verletzte im Spital z’lnterlake gha het. I der Regel heig me so am Morge zwüsche siebni u achti vo Partie-Kamerade, wo i d’Hütte sy cho z’springe, vernoh, am Tschingel- oder Breithorn heig’s es Unglück gäh. Während der Hüttewart sofort usgrückt isch, für a d’Unglücksstell ga z’hälfe, sy die andere wyter zoge, gäge Stächelberg abe. Gäge Mittag hei sie möge dert sy. Bis e ganze Rettigstrupp isch zäme gsi, isch es Abe worde. Am Morge, zwüsche zwöi u drü sy sie i dr Hütte gsy, wo der Verletzt die erschti Hilf bereits het übercho gha. Dert hei sie zwüscheverpflegt, d’Wösch gwächslet u churz glöiet u gäge die nüne sy sie wieder im Luterbrunnetal nide gsy. Meh als 24 Stund het so ne Bärgig duuret, längi Stunde für ne schwär Verletzte.
Hüt, wo zum grosse Glück wieder meh z’Bärg gange, chönnt me sich die Krachchischte vo Flugzüg u Helikopter gar nümme wägdänke.